ლეონარდო და ვინჩის "ლესტერის კოდექსი"_ ყველაზე ძვირადღირებული წიგნი

 

ლესტერის კოდექსი, რომელიც ლეონარდო და ვინჩის კალამს ეკუთვნის და დაწერილია მისივე "სარკისებური" შრიფტით, იკითხება მხოლოდ სარკეში. ესაა სამეცნიერო ჩანაწერების კრებული. ლეონარდო 4 წელი მუშაობდა ამ წიგნზე მილანში ყოფნისას და მას უწოდა "ტრაქტატი წყალზე, მიწაზე და ზეციურ საქმეებზე". ხელნაწერი შედგება 18 ფურცლისგან (72 გვერდი). 1506 წლიდან მოყოლებული 1510 წლის ჩათვლით ლეონარდო იწერდა საკუთარ დაკვირბებსა და ლოგიკურ დასკვნებს, თან ურთავდა შესაბამის ილუსტრაციებს, სქემებს, მათემატიკურ გამოთვლებს და ნახაზებს.

კოდექსის ყველა თავი იწყება მიმართვით შთამომავლობისადმი დამაჯერებელი განმარტებით, რომ სამყარო "ცოცხალი ორგანიზმია". ლეონარდოს აზრით: ჰაერი დედამიწის სულია, მისი ზედაპირი-სხეული, წყალი-სისხლი.

ჩანაწერები ეხება ბუნების სხვადასხვა მოვლენებს, მთვარის ნათებას, როგორ და რატომ მოედინება წყალი მდინარეებში, რისგან შედგება მინერალები და ა.შ. წიგნში ბევრი მათემატიკური გაანგარიშებები, დიაგრამები და ნახატებია. წიგნს "ლესტერის კოდექსი" ეწოდა გრაფ ლესტერის პატივსაცემად, რომელმაც ეს ხელნაწერი შეიძინა 1717 წელს. 1980 წელს წიგნი ლესტერის მემკვიდრეებისგან შეიძინა არმანდ ჰამერმა. მისი გარდაცვალების შემდეგ, 1994 წელს კოდექსი გასაყიდად აუქციონზე გამოიტანეს და ის შეიძინა მაიკროსოფტის დამფუძნებელმა ბილ გეითსმა $30.8 მილ. მისივე ინიციატივით "ლესტერის კოდექსი"ხშირად  გააქვთ სხვადასხვა მუზეუმის გამოფენებზე. 2003 წლიდან კოდექსი გამოფენილია სიეტლის ხელოვნების მუზეუმში.