რა საიდუმლოს ინახავს კინტა დე რეგალეირას სასახლე

ლისაბონიდან 30 კილომეტრის მოშორებით, ქალაქ სინტრაში მდებარეობს იდუმალებით მოცული კინტა დე რეგალეირას მამული. მნახველი გაოცებაში მოჰყავს პარკში განთავსებულ  შესანიშნავ მღვიმეებსა და გამოქვაბულებს, რომლის ცენტრში დგას ულამაზესი სასახლე უამრავი ამოუხსნელი თავსატეხით, რაც დღემდე გამოცანად რჩება.

ამ ძველი ნაგებობის ისტორია XVII საუკუნეში იწყება. მისი სახელი ბარონესა რეგელეირას სახელთანაა დაკავშირებული, ვისი საკუთრებაც გახლდათ ეს მამული. მკვლევარები და ისტორიკოსები ამტკიცებენ, რომ მამული სავსეა მასონური სიმბოლიკით.

სტიქსი_ჯოჯოხეთში გადასასვლელი

ბერძნული მითოლოგიის თანახმად მდინარე სტიქსი იყო გადასასვლელი იმქვეყნიურ სამყაროში-ჯოჯოხეთში. ის მიედინებოდა ორ ვერცხლის მასიურ სვეტს შუა და მას იცავდა ორი ნიმფა.

სტენფორდის უნივერსიტეტის მეცნიერები დარწმუნებულნი არიან, რომ სტიქსი ახლაც არსებობს პელოპონესის ნახევარკუნძულის მთიანეთში. მაგრამ ახლა მას  მავრონერი ჰქვია. მათი ასეთი დასკვნა ეფუძნება  ამ მდინარის წყლით  ალექსანდრე მაკედონელის მოწამვლის ვარაუდს. მდინარე მავრონერის წყლის ანალიზის შედეგად გაირკვა, რომ ის შეიცავს ადამიანისთვის მომაკვდინებელ მიკროორგანიზმებს. ამ მიკროორგანიზმებით გამოწვეულ მოწამვლას თან ახლავს ისეთივე სიმპტომები რითაც იტანჯებოდა დიდი მხედართმთავარი.

მითის მიხედვით მიწისქვეშა იმქვეყნიურ სამყაროს მართავდა ზევსის ძმა ჰადესი. ესაა სიბნელითა და საშინელებებით მოცული სამეფო, სადაც ვერ აღწევს მზის სხივი და სადაც მიედინება მდინარე სტიქსი. მის ერთი ყლუპსაც კი შეუძლია დაგაკარგინოს გონება და გაგიქროს მოგონებები.

ლიკურგეს თასის გამოუცნობი საიდუმლო

ლიკურგეს თასი ანტიკური დროის ერთადერთი დიატრეტია-ზარის ფორმის ორმაგი შუშის კედლებიანი ნაკეთობა, რომელიც ფიგურებითაა მოხატული. ზემოდან შიდა მხარე  დამშვენებულია მოჩუქურთმებული ბადით. მეცნიერთა ვარაუდით თასი დამზადებულია ან ალექსანდრიაში, ან რომში IV საუკუნეში. ლიკურგეს თასი ამჟამად ბრიტანეთის მუზეუმს ამშვენებს.

ხელოვნების ეს ნიმუში უპირველეს ყოვლისა მისი არაჩვეულებრივი თვისებებითაა ცნობილი. ჩვეულებრივი განათებისას, როცა სინათლე წინიდან ეცემა, თასი მწვანე ფერისაა, მაგრამ თუ უკნიდან გავანათებთ იღებს წითელ ფერს. თასი ფერს იცვლის იმის მიხედვითაც, თუ რა სითხე ასხია მასში. ის ცისფრად ანათებს თუ  წყალს ჩაასხამენ. მაგრამ  ზეთით გავსებისას, ის ღაჟღაჟა წითელ ფერს იღებს.

რატომ დაარქვეს ამ დიატრეტს ლიკურგეს თასი? გორელიეფზე, რომელიც მას ამშვენებს, გამოსახულია ვაზშემოხვეული წვეროსანი მამაკაცის წამება. ყველა ცნობილი ბერძნულ-რომაული მითებიდან ამ სიუჟეტს ესადაგება მითი თრაკიელი მეფე ლიკურგეს შესახებ.

ლეგენდის მიხედვით  ბაკხური ორგიების მოწინააღმდეგე ლიკურგე თავს დაესხა მეღვინეობის ღვთაებას დიონისეს. დახოცა მისი თანმხლები ბევრი მენადე და გაყარა ისინი თავისი სამფლობელოდან. გონზე მოსულმა დიონისემ ასეთი შეურაცხყოფის გამო მეფეს მიუგზავნა ნიმფა ამბროზია. ლამაზმა ამბროზიამ მოხიბლა ლიკურგე და დაითანხმა ღვინის დალევაზე. მთვრალი მეფე შეშლილს ჰგავდა, თავს დაესხა საკუთარ დედას და მისი გაუპატიურება სცადა. შემდეგ ვაზის ასაჩეხად გაეშურა, მაგრამ ხანჯლით 

საკუთარი შვილი დრიანტე აჩეხა, ვინაიდან ვაზი ეგონა. ასეთივე ბედი ეწია მის მეუღლესაც.

საბოლოოდ ლიკურგე დიონისესთვის ადვილი მოსანადირებელი გახდა. საბოლოოდ პანებისა და სატირების ხაფანგში გაება. თავად მოიკვეთა საკუთარი ფეხი და მალევე გარდაიცვალა.

გენეტიკური დისკის საიდუმლო

კოლუმბიის ტერიტორიაზე ნაპოვნ ქვის დისკს, რომელსაც გენეტიკური დისკი დაარქვეს, 27 სანტიმეტრის დიამეტრი აქვს და იწონის 2 კგ-ს. ორივე მხარე დაფარულია ნაყოფის განვითარების   ყველა სტადიის გამოსახულებებით. ამ პროცესს ახლა ექიმები სპეციალური აღჭურვილობით ახერხებენ.  საიდან ჰქონდათ ასეთი მონაცემები ექვსი ათასი წლის წინ? რა ცოდნას ფლობდნენ  ჩვენთვის უცნობი ცივილიზაციის წარმომადგენლები?

კოლუმბიელი პროფესორი ჰაიმე გუტიერეს ლეტა ათეული წლებია აგროვებს  უძველეს ნივთებს. მისი კოლექციის უმეტესი ნაწილი აღმოჩენილია ნაკლებად შესწავლილ და რთულად მისასველ სუტატაუსას რაიონში, რომელიც კუნდინამარკას პროვინციაშია. ამ კოლექციაშია: ქვები ადამიანებისა და ცხოველების გამოსახულებით, ასევე ნაკეთობები უცნობი სიმბოლოებითა და  უცნობ ენაზე შესრულებული წარწერებით.

გენეტიკურ დისკად წოდებული ექსპონატი დამზადებულია ლიდიტის ქვისგან. ეს ქვა მოიპოვებოდა ლიდიაში-მცირე აზიაში.  მინერალი სიმყარით გრანიტს უტოლდება, მაგრამ აქვს ფენოვანი სტრუქტურა და მისი დამუშავება რთულია.  ის დარლინგიტის, მელინიტის სახელებითაცაა ცნობილი. აქვს ხასხასა ფერი. ჯერ კიდე ანტიკური დროიდან მოყოლებული იყენებდნენ მას სამკაულებისა და მოზაიკის დასამზადებლად. მაგრამ მასზე რაიმეს ამოკვეთა თანამედროვე იარაღითაც კი პრაქტიკულად შეუძლებელია. ამის საშუალებას მისი ფენოვანი სტრუქტურა არ იძლევა. მიუხედავად ამისა, გენეტიკური დისკი დამზადებულია სწორედ ამ მინერალისგან. გამოსახულებები უფრო შტამპს ჰგავს ვიდრე ამოკვეთილ ნამუშევარს.

მაგიური ბროლის ბურთი

კვარცი ანუ მთის ბროლი უძველესი დროიდან ითვლებოდა ერთ-ერთ საუკეთესო მაგიურ ქვად. მისტიკოსთა აზრით მას განსაკუთრებული ჯადოსნური ენერგია გააჩნია. მისი საშუალებით კვარცის კრისტალში გამავალი მზის სხივი იძენს სამკურანლო თვისებას. ამის გამო მთის ბროლის ნაკეთობას მტკივნეულ ადგილზე იდებდნენ სამკურნალო დანიშნულებით.

სამკურნალო თვისების გარდა მისტიკოსები ბროლს მიაწერენ დადებითი ზეგავლენის უნარს ინტუიციასა და ზემგრძნობიარე აღქმაზე. ფიქრობენ, რომ ამ ქვაში გავლილი სინათლის სხივი განსაკუთრებულ ზეგავლენას ახდენს ტვინზე: ხელს უწყობს აზრთა კონცენტრაციასა და გლობალურ საინფორმაციო ველში შეღწევას.

კრისტალების, სარკეების, ბროლის სფეროების საშუალებით რომ შესაძლებელია მხედველობით ჰალუცინაციების გამოწვევა, ამას ადასტურებს სხვადასხვა  ხალხის ლეგენდები და წერილობითი წყაროები: უძველესი პერუ, მაგადასკარი, ძველი საბერძნეთი, ინდოეთი და ეგვიპტე. ყველგან თვლიდნენ, რომ ამ საშუალებით შესაძლებელია წარსულისა და მომავლის დანახვა.

იიგლავას კატაკომბების საიდუმლო

სამხრეთ მორავიის ქალაქმა იიგლავამ სახელი გაითქვა იქ არსებული კატაკომბებით, რასაც ბევრი მისტიკური ისტორია და ლეგენდა უკავშირდება. კატაკომბები XIII საუკუნეშია  აგებული. მიწისქვეშა ნაგებობა ოთხიარუსიანია, რომელიც 25 კილომეტრზეა გადაჭიმული ქალაქის ქვეშ.

როგორც წლების წინ, იიგლავას კატაკომბების ფენომენალური მოვლენები ახლაც აღვივებს თავგადასავლებისა და ამოუცნობი მოვლენების მოყვარულთა ფანტაზიას. ამბობენ, რომ ერთ-ერთ დერეფანში შუაღამისას ისმის ორღანის ხმა. არც მოჩვენებების ნაკლებობას უჩივიან. მეცნიერებს ჯერჯერობით ასეთ მოვლენებზე პასუხი არ აქვთ.

1996 წელს კატაკომბების კვლევას შეუდგა არქეოლოგიური ექსპედიცია. ჯგუფის წევრები აღიარებდნენ, რომ მიწისიქვეშ (10 მეტრის სიღრმეზე) მართლა ისმოდა საორღანო მუსიკის ხმა, რომლის წყარო დაუდგენელია. ახლომახლო არსად დგას ორღანი. ამ მოვლენასთან დაკავშირებულია ერთი ადგილობრივი ლეგენდა: უძველეს დროს, კატაკომბების სარდაფებში ინკვიზიტორებმა აწამეს ახლაგაზრდა მუსიკოსი, რომელიც არაჩვეულებრივად უკრავდა ორღანზე. წმინდა მამებმა მუსიკოსი ცოცხლად დამარხეს,  ვინაიდან გადამეტებული ნიჭი ეშმაკეულად ჩათვალეს.  საორღანო მუსიკა ახლა დღისითაც კი ისმის სწორედ მუსიკოსის წამების დღეს.

Codex Gigas_"ეშმაკის ბიბლიის" სახელით ცნობილი უზარმაზარი წიგნი

 ბიბლია, რომელიც "ეშმაკის ბიბლიის" სახელს ატარებს, იგივე Codex Gigas, გახლავთ XIII საუკუნის დასაწყისის უზარმაზარი ხელნაწერი წიგნი. ის დაიწერა ჩეხეთში, ქ.პოდლაჟიცეს (ბოჰემიის მხარე) ბენედიქტელთა მონასტრის კედლებში. წიგნის ზომა 90X50, წონა-75 კგ., ფურცლები დამზადებულია 160 ვირის ტყავისგან.

გადმოცემით, მონასტრის მორჩილმა ცოდვების გამოსყიდვის სანაცვლოდ ფიცი დადო, რომ ერთ ღამეში დაწერდა დიდ წიგნს და მინიატურებით დაამშვენებდა მას. მიხვდა რა, რომ ამის შესრულებას ვერ შეძლებდა, დასახმარებლად ეშმაკს მოუხმო. მან კი დახმარება გაუწია ბერს ჩანაფიქრის განხორციელებაში.  სანაცვლოდ წიგნს დიდი ძალა და დანიშნულება შესძინა. თითქოს ამის დასტური 290-ე გვერდზე მისი ცნობილი გამოსახულება გახლავთ. როცა წიგნი იპოვეს,  მასში 640 ფურცელი იყო. მაგრამ ფურცლები ძალიან დაცრეცილი  აღმოჩნდა და ჩვენამდე მხოლოდ 624-მა  მოაღწია. ხელნაწერი ლათინურადაა შესრულებული.

სიცოცხლის ყვავილი და საკრალური გეომეტრია

ეგვიპტეში არსებული ოზირიონის ტაძარი იმითაცაა ღირშესანიშნავი, რომ მის კედლებზე შესრულებული ზოგიერთი გამოსახულება დღემდე თავსატეხს უჩენს მეცნიერებს. ასეთი გახლავთ "სიცოცხლის ყვავილი". "სიცოცხლის ყვავილი" არის შესაქმეს სქემა, გეომეტრიული გეგმა. ეს გამოხატულებაა შემოქმედებისა, რომელიც ჰქმნის აბსოლუტურად ჰარმონიულ ველს. ის ისევა აგებულია, როგორც ყველაფერი ამ სამყაროში.

ინტუიციურად ყველანი ვგრძნობთ, რომ ერთმანეთთან რაღაცით ვართ დაკავშირებული-ერთიანობის კონცეფცია. "სიცოცხლის ყვავილის" დანიშნულება გახლავთ გვიჩვენოს სიცოცხლის ერთიანობა ყველა ქმნადი ფორმის განმეორების საშუალებით-ერთი ფორმა განსაზღვრავს მეორეს. როგორ თავსდება ისინი ერთიმეორეში და როგორ ვართ შექმნილნი ერთი ღვთიური გონის მიერ.

შემოქმედმა ჯერ შექმნა"სიცოცხლის თესლები". სიცოცხლის თესლი შესაქმის შვიდი დღის სიმბოლოა. პირველად შეიქმნა ოქტაედრი. ამ ფორმამ დაიწყო ბრუნვა და გაჩნდა სფერო. ამ სფეროს შიგნით იმყოფებოდა შემოქმედის გონი. ერთადერთი რაც არსებობდა იყო მემბრანა, თავად სფეროს ზედაპირი.

ტურგუილი_დაკარგულთა ველი

საფრანგეთის პირენეების პატარა ქალაქ კუსერანსთან არსებულ ტურგუილის ველს ადგილობრივებმა "ჩვიდმეტი ველის ადგილი" დაარქვეს, სადაც თავად ცხვირსაც კი არ ჰყოფენ. ხანდახან იქ უცნაური ამბები ხდება. სწორედ ამ მიზეზის გამო, მას "დაკარგულ სიცოცხლეთა ველსაც" უწოდებენ. ამბობენ, აქ დასეირნობენ ქალისთავიანი მგლები. ტურგუილის ველს გარშემო პირენეის მთები არტყავს. ცენტრში კი  ლურჯად მოკამკამე ულამაზესი ტბა ალეტია.  უკვე მრავალი საუკუნეა აქაური მოსახლეობა არ ეკარება და არც სხვებს უშვებს ამ ადგილზე. მიზეზი კი ის გახლავთ, რომ ამ ადგილზე ბევრი ადამიანი  დაიკარგა სამუდამოდ. დაკარგულები თითქოს შეერწყნენ ალეტის სარკისებურ წყალს.

არსებობს ლეგენდა, რომ  დანაშაული ქალისთავიან მგლებს მიუძღვით. იმასაც ამბობენ, რომ ტბის ნაპირას ცხოვრობენ ჯადოქრები. ისინი მსხვერპლს უთვალთვალებენ და კვალდაკვალ მიჰყვებიან. ისეთი "ბედნიერებიც" აღმოჩენილან, ვინც მათგან თავის დაღწევა მოახერხა, მაგრამ რამდენიმე კვირის შემდეგ  გადასხვაფერებული დაბრუნებულან- გარეგნულად დაბერებულნი ყვებიან საშინელ ისტორიებს. ვინც გადარჩა, რამდენიმე წელიწადში შეურაცხადად იქცა.